【本報訊】譚雅士大宅業主原本計劃復修後改為住客會所，每月向公眾開放一次，最後在城規會要求下增至每周至少開放一次，並設在公眾假期，保育團體希望業主是真心開放，並提供更多支援，令參觀的巿民進一步了解大宅的意義。
「希望安排得好啲」
立法會議員陳淑莊認為必須保留公眾參觀的機會，「家咁都唔係真正嘅對外開放，要視乎佢嘅開放程度去到邊，始終佢嗰度第日係會所，去到睇住啲人跑步咁係唔係好奇怪，好似唔係好適合，希望安排得好啲。」
長春社公共事務經理李少文希望業主可以提供更長的開放時間，讓公眾參觀，「雖然一個禮拜只係開放一日，但都係好嘅開始，最好可以免費畀啲團體、弱勢社群參觀。」
綠之源總監張麗萍認為，能否起到保育效果，視乎具體安排，「好多公共空間都話係開放o架，不過係擺好多人喺度，令到你好唔舒服，希望佢哋可以全心去開放，幫助啲入去參觀嘅巿民了解裏面嘅特色。」她期望政府更積極推行保育工作，及早與業主展開討論，以免私人物業擁有者無所適從。