全港關注財爺病況，行會召集人梁振英噚日喺北京開腔談論鬍鬚曾情況，佢話呢種心臟病好多人都有，相信康復後唔影響工作，似在暗示大家唔使大驚小怪。梁振英又話家市民對官員期望高，做官嘅壓力好大，希望市民體諒，有人多心，覺得好似暗寸有人頂唔住壓力喎。
梁振英又指鬍鬚曾生活習慣向來健康，忽然急性心臟病入院，相信同工作壓力大有關，至於健康狀況會唔會影響鬍鬚曾角逐下任特首選情，梁振英拒絕評論。至於佢自己，就每年一次體檢，醫生話佢一切正常冇事，可以繼續工作。
多做運動冇病痛
呢個結果，對佢而言係好事，對唐公子則睇你點睇，梁振英又透露保健方法，表示自己比較容易放鬆心情，亦冇乜不良飲食習慣，加上平時比較多做運動，所以冇乜病痛。梁振英大方披露健康狀況，其他疑似候選人唔跟，怕且有啲蝕底，唐公子身為政務司司長，應該帶頭以身作則，不過透明係有限度嘅，講到同中共有乜關係，唔知梁振英有冇咁open嘞。