好打得局長林鄭噚日去浸大與學生座談，有學生指政府建議強制拍賣舊樓門檻，由九成業權減至八成，係偏幫大財團嘅「收樓23條」惡法，剝削小業主權益，質疑市區重建「以人為本」宗旨吹水。林鄭好淡定咁話，人人以為改例益咗地產商，實情佢收到好多小業主來信表態支持，更強調寄信畀佢者全部有名有姓，有個住西環嘅婆婆請佢上門，話早就想賣出殘舊單位套現，可惜無人問津，佢要繼續坐困爛樓，一旦成功修例，佢有機會賣甩舊樓改善環境。
大地產商拆樓重建豪宅，原本住喺度嘅公公婆婆，有冇能力住番入去呢？如此「改造」舊區，就係以人為本？林鄭噚日又話最鍾意做社署署長職位，唔係因為大刀闊斧削減綜援好快感，而係做社工係年少夢想。