九月二十五日中大新亞書院舉行六十週年院慶暨獎學金頒獎典禮，最後一個獎係「誠明獎」，得獎者就係是年最佳畢業生，係頒畀成績最優異與曾有在學生會、義工服務紀錄嘅學生。逸夫堂內，見到香港專業教育學院摩利臣山分校嘅校長郭啟興笑到四萬咁口，於是問佢為何咁好笑容，走返母校攞獎乎？郭校長聽見攞獎兩個字，更加笑到見牙唔見眼，咭咭笑咁講：「唔係我攞獎，係我個仔攞誠明獎！」吓，乜佢位公子讀書咁厲害？連忙恭喜，問多啲詳情。郭校長於一九八二年新亞經濟系畢業，二十七年後，佢位公子文德在新亞歷史系畢業，更係一級榮譽生，三年平均GPA有3.78，最後兩個學期平均績點更達4分，讀歷史而攞滿分，簡直令人難以置信。佢嘅老師、歷史系黎明釗教授寫讚詞，提及郭文德在新亞「兩度獲得逯耀東教授史學論文紀念獎學金，論文題目分別是〈唐德宗、楊炎、劉晏黨爭及其影響〉和〈科舉命題的政治文化及意義：以北宋科舉的進士科正奏名殿試試題為例〉，都是史料豐富，論證嚴謹、原創性高的作品。」
仲以為今天學生，大都不讀中史，古代歷史冇乜人理會㖭，新亞竟出現一位傑出歷史系學生，實不負錢穆先生之創校旨趣。這位學生嘅畢業論文係〈晉代免官制度探討〉，從《晉書》、《宋書》、《資治通鑑》、《建康實錄》、《通典》等資料史料梳理二百四十個晉代案例，大受黎明釗教授稱讚。
頒獎禮後，左丁山有機會問郭文德幾句：「你個樣咁文靜，平時有冇打機？有冇睇日本漫畫？」郭同學話：「梗係有啦！」郭爸爸加多一句：「睇漫畫直情十分投入㖭！」點解對歷史咁有興趣呢？佢話自小睇《三國演義》，讀《三國》讀到入晒迷，故此中學揀讀文科，以入讀中大新亞歷史系為第一志願。將來又點？郭同學話現正攻讀中大歷史碩士，希望有機會到哈佛讀博士。於是大家鼓勵佢走余英時之路，由新亞往哈佛，繼而成為著名教授。可惜呢日見唔到另一位「誠明獎」得獎者李笑燕，根據讚詞，李同學來自問題家庭，努力求學，在化學系以一級榮譽畢業，勤做義工，還寫了一篇論文獲國際期刊選載，認真難得！