陳奕迅（Eason）同謝安琪嘅緋聞傳咗多時，早前佢接受台灣傳媒嘅視像訪問時，因為被傳媒硬要求證明同老婆徐濠縈嘅感情「美滿到不行」，搞到Eason即時扯火黑面。不過，噚日Eason到台灣為國語專輯《上五樓的快活》舉行亞洲記者會時，吸引過百傳媒採訪，心情極靚嘅佢仲好鬼馬㖭。
冇獎即跳海
記者會佈置成一個錄音室，Eason好high咁喺台上又唱又跳，仲興奮到成個人瞓咗喺地，唔知係咪呢排成日傳佢婚變，馮仁昭見佢手上忽然戴住婚戒，唔知係咪用行動證明同太太感情不變。
Eason接受訪問時被追問同徐濠縈嘅感情問題，佢解釋之前因為拍戲，所以除咗婚戒，家宣傳唱片做番自己就戴番婚戒，佢話：「我和太太未到美滿到不行，但是美滿，我沒有搬去工作室，如果是都搬到四季跟陳冠希sayhi啦。」
台灣方面宣傳Eason嘅新碟可謂無所不用其極，除咗早排誇口5日內唔滿意可退貨外，Eason自爆連監製林暐哲都話如果隻碟攞唔到任何一個金曲獎，監製就會跳海，搞到Eason話：「呢度啲宣傳好狠，佢跳我都跳，可以着泳褲。」
記者會上，主持陶子除教Eason講台語諧音粗口外，又問Eason鍾唔鍾意自拍，但佢指嘅係淫照，Eason即刻話鍾意着住衫影相多啲。
