明星風光背後，辛酸難為人知。阿嬌淫照事件後，Twins拆夥，阿Sa蔡卓妍獨力支撐，帶病開工的她，前晚自爆暈倒家中休克反白眼，迷糊中腦海只閃過想休息的念頭，不過手頭仍有四部片約在手，更不敢看工作期排到何時，怕再被嚇暈。
蔡卓妍、關心妍、謝婷婷、何超盈（Sabrina）和男友Greg、羅霖等，前晚在灣仔出席Moiselle09秋冬時裝騷。近期患病的阿Sa，自爆大前晚在家中廁所暈倒幾十秒，一度休克，幸沒有撞傷頭，她說：「未病好呀，噚晚仲喺屋企暈咗，之前成日都會暈，今次可能感冒藥太勁，阿媽好驚，不停打我心口，我醒咗之後全身標冷汗，心口紅晒。」
「怕老咗喺病床過」
阿Sa指自小已有突然暈倒的問題，試過在銅鑼灣、尖沙嘴、屋企樓下等多次暈倒街頭，更試過在江門表演時突然作暈，幸好按住dancer及時返回後台，阿Sa表示曾經就醫，醫生指她是精神緊張，她說：「Bodycheck冇事，可能我一路病緊，冇乜休息，太緊張，鬆番就嚟。」
問到阿Sa隨時會暈，會不會有生命危險？她說：「唔會，不過媽咪噚日話我反白眼，好似休克咁，好驚我會死，我突然個腦閃過一個念頭，好想暫時休息，唔做嘢，可能一年啦。」問她可有與公司商量或爭取假期，阿Sa無奈地說：「冇，做埋手頭啲嘢先，手頭仲有四部戲，排到好遲先得，幾時我都唔想睇，費事睇到再暈過。」阿Sa有幾分感慨說：「身體好緊要，錢係搵唔晒，後生都仲頂到，怕老咗要喺病床上過。」她又謂未諗到嫁人，只想休息。
舊愛為超盈做晚裝
此外，超盈和男友Greg一同捧場，之前曾傳緋聞的Moiselle太子爺陳柏熹（Harris）特別為她設計了一件全人手製、價值$69,999的「SabrinaDress」，Harris說：「大家係朋友，一齊經歷咗好多嘢，過咗好多關，彼此無猜忌。」他更透露超盈上周生日，生日願望是賭王父親身體健康。
採訪：羅慧敏
攝影：葉君海