「鎖你（sorry）！」「唔慶祝！」就算我求大俠冇問過綽號「野獸」嘅曼城射手泰維斯，都知佢前晚對韋斯咸兩番入波後，向住韋斯咸球迷舉高手喺咩意思。就算因為佢令韋斯咸輸1:3，但因為佢咁識做，「槌仔幫」球迷都會消消氣。比起艾迪巴約早排倒戈對阿仙奴狂奔慶祝惹軒然大波，泰維斯真「世界」，就計呢樣就贏艾迪巴約幾條街。
蘇拿：佢係君子
呢場波焦點落喺兩個倒戈前鋒，即係泰維斯同埋比拿美身上，結果前者威風得多，上半場開波5分鐘就近門接應傳中射入，令曼城領先，雖然韋斯咸一度由卡頓高爾扳平，但馬田柏杜夫建功；加埋泰維斯下半場埋齋，令曼城開季6場贏5場，係自1961年以嚟最佳開季。家陣隊波只係落後比自己多賽一場嘅曼聯、車路士3分，難怪奪標賠率由賽前15倍再升溫至12倍。
講番泰維斯，雖然佢3季前曾經幫韋斯咸成功護級，但開波初段都俾韋斯咸球迷柴台；不過佢認真識做，兩次入波後都舉手，冷待衝上嚟想慶祝嘅隊友，「槌仔幫」條氣即時順晒，領隊蘇拿都忍唔住大讚：「佢唔止係偉大球員，仲係一個君子。我相信球迷唔會忘記佢曾為球隊作出嘅貢獻。」
柏杜夫落力博續約
其實馬田柏杜夫都係世界仔。今場波係佢今季首次正選落場，結果就入一個靚罰球。到下半場完場前，明明隊波贏硬，但佢有球波射高之後仍然表現激動。梗係啦，據講佢同曼城傾緊續約，加上年紀唔輕，唔賣力至奇。所以，雖然曼城王牌球星羅賓奴仲要唞多3個禮拜，但泰維斯、比拿美都「弗」，加埋馬田柏杜夫一定去盡，有排贏呀！