被譽為天之驕子嘅政務主任（AO）職系，離職潮由新入職擴大至資深AO，可能令制訂政策中流砥柱出現斷層。為填補空隙，政府向借調去半官方機構嘅AO埋手，班師回朝，借調去再培訓局做行政總監嘅潘婷婷，據知今年底就重返政府，再培訓局要公開招聘新人。
馬房文化趕走人才
咁樣調動都未必解決到問題，因為有經驗AO流失似成趨勢，民政事務局副秘書長蘇錦成就會去申訴專員公署做副專員，薪級不變都寧願放棄有優厚長俸嘅鐵飯碗，可想而知去意幾咁堅決。前資深AO慨嘆都係煲呔搞「馬房文化」之過，加上副局長、政治助理空降，令AO更感冇癮。
有人估計資深AO起身陸續有來，上述再培訓局行政總監月薪10幾萬元，對AO肯定有吸引力。貿發局亦有兩個筍位極可能向AO獵頭，該局一個副總裁年初過身，另一個將退休，聽聞最想搵有豐富行政經驗嘅AO頂上，聽聞已完成甄選程序，如果一切順利，不排除短期內揭盅。