領匯瘋狂加租，巿民最終受害，幫襯街坊醫生數十年的李伯，平均一年看三、四次醫生，數年前商場舖位大幅加租，商場內的診所也被迫加價，街坊醫生被逼遷，他惟有轉到醫院管理局看專科門診。
李伯居於慈雲山慈正邨，一住數十年，親歷區內變遷，看着龍翔中心興建，從前看街坊醫生收費只需60、70元，「以前好平o架，家要百幾、二百蚊，二百幾蚊都有，家若果有病就睇45蚊嗰啲。」他口中所謂45元醫生，是指醫管局的專科門診部，他批評領匯做法不合理，「初初政府起好商場，唔應該畀領匯。」
「對巿民好唔方便」
關懷香港召集人郭家麒指出，現在龍翔中心內的醫生被遷停車場樓層，「要坐先去到，好多長者要坐輪椅，用枴杖，好多關節有問題，去唔到嗰度。」
觀塘區居民黃先生則指，大幅加租令醫生加診金，醫務所要搬離屋邨，「令到我哋頭暈身㷫嘅病人，影響好大嘅，因為發燒呀、頭暈呀，已經係暈吓暈吓，咁仲要老遠咁搭車去醫務所，呢個係極之無良。」他認為領匯應承擔社會責任，保障公屋居民健康，「當嗰啲獨立嘅醫生逼到維持唔到運作，新加盟嘅（醫療集團）入嚟，（街坊醫生）睇開有感情，新嗰啲唔知跟唔跟進到，又可能唔夾，對巿民好唔方便。」
本報記者