馬會大董請客，左丁山忝陪末席，上到沙田馬場七樓董事與遴選會員廂房，嘩，乜咁鬼靚o架，與七月一日所見，完全不同，簡直係百分之一百全新裝修。由七月一日至馬季結束，至九月十三日新馬季開鑼，只得七十三日時間，大規模內部裝修竟可以全部竣工，效率實在驚人，大董都話抵讚。馬場裝修有一個特點，就係因為馬場離開民居，不怕噪音引起投訴，可以一個星期七日，每日廿四小時趕工，香港工人只要有誘因，有良好管理，勤奮態度與效率，一定係世界級嘅。
後來在馬場內碰到一位知情人士，問佢邊間公司負責裝修工程，佢話：「工程顧問好似係Arup，裝修承建商就係中國建築。中國建築以前承包奧運馬術場地興建及新馬房建築，全部在緊急時間內全無甩拖，如期完成交貨，你知啦，馬會啲工夫好難啃o架！馬季越係長，歇暑日子越係短，每年暑假做緊急維修與新裝修，真係趕工趕到命都冇。呢間中國建築算係好嘢。」
完成就得啦，中間嗰種辛苦法，馬迷唔會理嘅，做唔完就一定鬧，他日部份馬匹運去從化馬房，馬迷會鬧咗特區政府冇良心，只識收稅過百億，但死都唔肯在香港（譬如大嶼山）撥地興建新馬房。馬主N睇完九月二十五日本欄之後，向左丁山解釋：「據我所知，未必係要一啲練馬師調去從化練馬嘅，應該係將一啲初到境新馬、傷患馬、放草馬等，運去從化休養生息，新馬通常要訓練幾個月先至可以正式開操嘅，放在從化大馬場，有較好自然環境，可上山落山，識得競賽為何物嘞，先至運返本港。將呢幾類馬放在從化，可減輕本地馬房嘅負擔！」
聽落又唔錯。《大公報》報導過，內地賽馬會一年內先在若干城市開放，用日本模式營運，收入撥作農村建設，中國已派人去日本考察，學習日本賽馬，但唔會採用香港馬會模式。咦，如此說屬實，將來中國需要識得中英日三國文字嘅賽馬管理人，香港馬圈中人大都識中英文，不如學埋日文，到中國講馬有優勢！