覓得第二春嘅立法會主席曾鈺成鐵定11月21日周六下午3點，同拖友伍嘉敏喺會展新翼簽字結婚，唔揀婚姻註冊處，曾鈺成苦笑話當日係大好日，好多場地冇檔期，因此搵律師到會展見證。
不過呢位律師證婚人乃非一般律師，係身兼基本法委員會副主席嘅前任律政司司長梁愛詩。搵到詩姐證婚，真係唔係個個有咁嘅面子，一對新人同證婚人都根正苗紅，呢個婚禮真係紅到爆！今次結婚唔擺酒，不過嘉賓名單都有幾百甚至上千人，阿曾話保證59個議員都派帖，唔會學中央咁篩選十．一上京觀禮名單。
唔入立會影相
白鴿黨涂謹申早前破天荒入立法會影結婚相，阿曾卻話冇諗過效法，唔係因為咁做唔啱規矩，只係因為佢怕羞。佢自稱再婚最大好處係多咗理由退休，少啲機會講錯嘢。阿曾將赴京慶十．一，佢話好多政界中人交陳情信畀佢，請佢直接交畀胡主席，佢笑言所託非人，因為佢不能直達天庭，冇乜機會面見領導人，遑論交信。