如果沒有那一跤，香港的命運會否不一樣？
1982年9月24日，英國首相戴卓爾夫人訪華，在北京與中國領導人鄧小平就香港前途問題展開討論。英國提出1997年後繼續管治香港，被鄧小平拒絕，鐵娘子氣冲冲步出人民大會堂，在走下石級時摔了一跤。這一跤，為香港驚濤駭浪的回歸故事揭開序幕。
記者：張嘉雯
余生成長時，香港社會風起雲湧。六七暴動爆發，他正在新蒲崗機器廠工作，一次放工遇上暴動，電視台來採訪，給他遇上當新聞部攝影師的朋友，朋友知他愛影相，問他：「你想唔想學嘢？我教你影啲『郁嘢』吖！」
「佢攞住清朝條約嚟講」
好奇的他為了學影「郁嘢」，加入無綫電視新聞部攝影組，拍攝過文革時偷渡客從水路來港，也試過跟水警出海，打撈內地漂浮過來的屍體，「啲人俾麻繩五花大縛，有啲腸穿肚爛，俾魚咬到得個殼，塊面爛晒。」
多年來，他採訪大新聞無數。1979年英國學者訪問北京，他奉命採訪，第一次跟鄧小平見面。他憶述學者問鄧搞改革開放會不會太快，「佢答話我都咁大年紀，仲唔改革開放等幾時？」
1982年9月24日，戴卓爾夫人訪華，記者在人民大會堂外等她出現，趙紫陽也在門外迎接。余生記得當時有香港記者問趙紫陽，會不會談香港問題，「佢嗰時答主權我哋一定要收番，其他嘢我哋慢慢商量。」這句話，已令港人非常震撼。
那天，鐵娘子堅持保留香港島及九龍半島主權，被鄧小平嚴詞拒絕。會談結束，戴卓爾夫人步出人民大會堂時更跌倒。
「（中午）12點幾出嚟，有車隊接佢，我嗰時諗住影佢行落嚟，後面有大會堂做背景咪幾好。」同行記者及其他行家留守門前，霸位等「扑咪」，「我嗰時諗佢出嚟一定唔會講嘢，覺得影佢行落嚟上車個畫面好睇啲，咪博一博囉。」
余生說，當時戴卓爾沒看梯級，又穿高跟鞋，結果跌了一跤，護衞即時衝上前扶起，余生把整個過程拍下，這段片成了全球獨家。
「佢（戴卓爾夫人）啱啱打完勝仗（指福克蘭群島戰爭），意氣風發，攞住清朝條約嚟講。鄧小平話條法已經廢咗。嗰時佢仆親大家都好驚o架，諗住英國政府仆街喇，覺得係壞開始、唔好嘅兆頭，戴卓爾夫人都要向毛澤東叩頭。」
中英談判展開，余生一共採訪了19次，北京成為他第二個家。中英雙方最後在1984年簽訂《關於香港問題的聯合聲明》，正式宣佈1997年7月1日起，中國對香港恢復行使主權。
李鵬飛：英國部署撤退
曾任行政立法兩局議員的李鵬飛，年輕時由內地偷渡來港，至1976年才第一次回內地參觀，「窮得不得了，全部人都着同一種色嘅衫，一係藍、一係灰，本來去四日，頂唔順去咗兩日就走人。習仲勛（現任國家副主席習近平父親，當年邀請李鵬飛訪問內地）問我，到底落後西方社會有冇50年，我話『50年？一個世紀就差唔多。』嗰時睇到咁窮，好失望，曾經同朋友講過以後都唔返大陸。」
兩年後，他當選總商會會長，經常要到訪內地。中英談判，港督尤德又請他幫忙，「本來我對中國冇興趣，但嗰時成個立法局入面得我一個有中國經驗，好多人1949年出咗嚟之後都唔敢返去，其實我都唔係中國專家。」
他說，英方早在1979年末，已經知道中共對收回香港主權事在必行，「但係唔敢講，驚講咗出嚟雞飛狗走，但英國佬早已部署撤退。」直至戴卓爾夫人在人民大會堂跌倒，香港人才知道主權問題已迫在眉睫，「後來佢冇做首相，有次嚟香港，我坐佢隔籬，問佢點解嗰次會跌親，佢話『我當時一邊走一邊想，為甚麼中國這個小矮人，說話會這麼兇惡。』」
港是一國兩制示範單位
1983年5月，李鵬飛率領才俊團訪京，提出主權換治權的想法，結果失望而回，「嗰陣英國人都有諗過，淨係畀返界限街以北，香港島同九龍就永久畀咗英國，諗住死都撐住，點知唔夠兩個禮拜，鄧小平一句冇得傾，話香港九龍同新界係一體，就冇咗。」
當時內地改革開放才剛實施了五年，經濟環境遠遜香港，各界千方百計，希望把回歸的限期推遲，兩局議員更提出，要讓英國統治多10到20年，等中國的經濟水平與香港相近，才讓中國收回香港。
「鄧小平係好精嘅人，佢話唔要三腳凳，即係話香港人喺前途問題上冇份話事，只可以有兩腳凳，我哋嗰時成日話兩腳凳坐唔穩。」同年年尾，中英談判破裂，觸發信心危機，「香港人好恐慌，個個想攞外國護照，89民運後更厲害，我哋之後見戴卓爾夫人，希望幫香港人爭取英國護照。」
回望過去，李鵬飛形容香港是一國兩制的「示範單位」，中央最大希望其實是收回台灣，「但係台灣民主選舉差不多七成幾人投票，人哋喺民主嘅過程中學咗好多嘢，你話要整個800人委員會出嚟選，台灣人實唔制啦，你話想收返台灣？妄想！除非用軍力囉。」李鵬飛形容香港是一個壞的示範單位，「香港到家都冇正式嘅民主選舉，你話2,300萬台灣人點諗？自由行冇所謂、投資冇所謂、搵錢冇所謂，一講收返就冇得傾。」
