財爺鬍鬚曾漏夜緊急入院通波仔，高官口徑一致話手術好成功，唐唐探病後仲話同鬍鬚曾有講有笑㖭。雖則鬍鬚曾係劍擊高手，習詠春多年，甄子丹都叫佢做師兄，不過突發性心臟病可大可小，如果佢真係已經講得笑，真係康復神速喎。
「出院可唔可以彈琴？」
可能已經唔似係角逐下任特首對手，唐唐同鬍鬚曾冇乜心病，所以可以講笑話。消息稱鬍鬚曾手術後狀態甚好，即刻問醫生可唔可以出院返工，又可以坐起身，好認真咁問醫生，康復後可唔可以彈鋼琴，醫生諗一諗，話如果完全康復，彈鋼琴絕對冇問題，點知鬍鬚曾話：「不過我以前唔識彈琴喎！」有心情搞gag即係冇事啦。
小病是福，官場中人笑言可能其他司局長都想瞓幾日醫院，咁就唔使日日朝學習、晚祝禱咁出席十．一慶祝活動。鬍鬚曾平時形象不苟言笑，通波仔後忽然幽默，恐怕係另類手術後遺症噃，係咪罕見醫療事故，抑或手術後有啲嘢遺留體內，產生副作用導致佢喺病床上都忍唔住講爛gag？八方認為醫管局需要認真查究，問責到底。
鬍鬚曾病情係咪已無大礙呢？佢通波仔後性情驟變，就係呢點，八方認為值得對官方講法存疑。有冇人隱瞞內情，暫時唔可以貿貿然講，不過噚日記者問主診醫生李偉聯，財爺有冇生命危險同埋是否工作壓力太大致病，食物及衞生局局長周一嶽好緊張，即刻指令李醫生行開，「唔好講咁多喇，李醫生要返去做嘢。」
姨媽匆忙趕到探病
高官位高權重，市民對佢哋健康狀況有知情權，好似老董咁，腳痛多時都唔出聲，忽然唔做，真係嚇親好多人。鬍鬚曾姨媽就更加緊張，噚日傍晚匆忙趕到醫院探病，不過冇透露鬍鬚曾情況。政界亦十分關心財爺，中聯辦、外交部駐港特派員公署都有送花籃慰問，工作人員送入病房，民主黨個花籃冇資格登堂入室，放在外面算數，明顯親疏有別。
權貴留醫養病，瑪麗醫院不敢待慢，噚日唐唐等高官探病前，有個工人趕忙打蠟將地板「省」到立立令，恭迎高官。
mailto:[email protected]