市況唔就，周五掛牌嘅恒盛地產（845），剛傳出配發結果已嚇到班鍾意玩大包圍嘅股蟻鼻哥窿冇肉，傳1手中籤率高達50%，抽3手便可穩獲1手；連B組中籤率都有4.7%，若借九成孖展頂頭槌中籤率唔過1成唔使補孖展，但即使如此，中咗都要望天打卦。
市場情緒大逆轉，利郎（1234）同中冶（1618）通通冇運行，潛水股陸續有嚟。事實勝於雄辯，借孖展抽IPO查實風險無限，唔理好醜嘅結果，就係小注變嘥心機捱眼瞓，大注就有得震冇得瞓。
當銀行有見新股例升神話幻滅，即時收緊IPO孖展息率同借貸上限，恒盛已經截晒孖展飛縮都縮唔切，大家唔好怪四叔唔早響，講到明係畀面派對，就知道根本唔關專唔專業。
經紀危難見真章
以前喺大行做經紀，服侍過唔少專業投資者（PI），總之你交代晒所有風險同詳細內容，抽唔抽佢哋好快有決定，好少嘮嘮叨叨，若見勢色唔對，一個電話打嚟就二話不說抽飛，你嘅責任係以極速幫佢刮料，有筍嘢知會、有危險單聲；反而唔少細細注大大聲以為自己係大戶，郁吓就騰晒雞。
啲客有時會半講笑咁問：「呢隻你自己會唔會買？」甚至係「你會唔會叫你阿媽買？」只係市場中能夠將客戶利益凌駕自己好處者又有幾人？假如閣下擁有如此盡責之經紀，就係你嘅福氣。其實證監會窮追猛打利益衝突事件，都唔及客仔自己做盡職審查。
以下幾個要點大家可以做Checklist，睇睇有幾多個「剔」：恒盛主打上海、北京又多土儲，但係有冇人提醒你，公司賣埋旗下樓盤嘅會所後，短債仍超過60億元？留意早喺6月上實（363）計劃以20億元，收購恒盛的上海尚海灣豪庭項目4幢在建樓盤，但又賦予恒盛3年後有權透過子公司回購項目，心水清嘅都知公司已盡力減債。有冇人話你知喺上市後晉身上海首富嘅恒盛老闆，原來亦係公司承建商（未納入上市公司資產內）嘅揸Fit人，當中可能產生關連交易？你有冇獲告知公司手上1360萬平方米土儲，係咪全部攞到土地使用權？
胡孟青