港股上禮拜五守住20日線反彈，個勢轉番好啲，不過外圍唔就，港股噚日冇延續反彈，仲大幅低開，形勢咁差，恒指要下試50日線已經無可避免，不過50日線叫做有啲支持，呢關守唔守得住，今日應該有分曉。碰啱今日期指結算，又就嚟放假，相信個市靜得嚟會好波動。
煤氣C輪18013：中華煤氣（003）昨收18.94元，跌0.2%，連續第2日守住條20日線，睇陰陽燭同成交變化，有機會試番上禮拜嘅高位19.80元，破位睇21元，可以諗吓隻C輪18013。隻輪現價31仙，2010年3月30日到期，行使價18元，溢價11.4%，引伸波幅50.7%，有效槓桿率3.8倍，正股升上21元，18013睇44.9仙，正股跌穿17.90元就沽咗隻輪。
俊樺