噚日風大雨大，不過八方無懼風雨，揚帆出海。因為好難得先可以同知名探險家MikeHorn吹住海風暢談探險同環保心得。呢位闖蕩南北極多過八方上北京嘅43歲南非人正在環遊世界，近日來到香港。八方問佢對香港有何印象，佢話覺得香港太光，一定消耗好多能源。
MikeHorn沿途不斷招攬年輕人上佢嘅Pangaea帆船，一齊周遊列國對抗污染。Pangaea至今唯一一位中國年輕探險家來自深圳，係18歲嘅高中女生李珺。小姑娘今年5、6月隨船去到新西蘭誘捕白鼬，佢話白鼬喺新西蘭係外來物種，成日食晒啲珍貴雀鳥嘅蛋，破壞生態平衡。李珺將返回深圳繼續升學，佢呼籲全國年輕人多啲關心環境，唔好淨係顧住搵錢。