唔好以為周日場英超聯新特蘭迎狼隊戲碼麻麻，就一定唔好睇；結果兩隊合演一場多入球賽事，新特蘭以5:2勝出，爆出100倍嘅波膽！不過，我求大俠見到新特蘭領隊布魯士賽後面黑黑；原來一心要令「黑貓」重拾光明嘅布魯士，係怪一對前鋒堅韋尼鍾斯（K鍾）同戴倫賓特（D賓）攞場波嚟較飛，幾乎壞大事！
D賓讓射12碼捱轟
布魯士今夏接手「黑貓」新特蘭，即豪花3,000萬鎊（約3.8億港元）擴軍，擺明目標唔止護級咁簡單，而係想新特蘭好似佢哋主場個名光明球場一樣，重拾光明。點知一對前鋒D賓同K鍾唔生性，喺周日迎戰狼隊時，竟然玩「孔融讓梨」，布魯士唔嬲就假啦！事情係咁嘅，今屆以1,000萬鎊加盟新特蘭嘅D賓，喺開賽8分鐘已為球隊射入12碼領先，喺48分鐘時，新特蘭又獲得極刑，點知D賓唔射讓畀佢嘅拍檔K鍾射，好彩射入，新特蘭領先至2:0。
不過及後狼隊藉住新特蘭文沙嘅烏龍同埋奇雲杜里建功，追和2:2，雖然及後新特蘭入多3球以5:2勝出，目前以4勝3負排第8。不過布魯士就好唔高興話：「我並冇球隊大勝之後嘅喜悅，我哋被追平2:2時，我更一度擔心會反輸。由於我自己比較迷信，當己隊獲得12碼時，我唔會去睇球員射，所以一直以為D賓會梅開二度，要到副手布力克話我聽，先知發生乜嘢事。」
「friend底都冇情講」
布魯士越講越火，勁插D賓同K鍾：「我淨係知道唔可以再發生呢種事！試想如果K鍾射失，後果有幾嚴重？因為你同某人friend底或者覺得佢應該有波入，就讓個12碼佢射，係學生玩泥沙嘅行為，並唔適合英超！D賓係本國數一數二嘅劊子手，無論我哋係領先緊5:0抑或6:0，只要D賓仍喺場上，都應該由佢操刀！」D賓K鍾，你估家猜包剪，邊個贏邊個射咩！