內地各省市忙於大搞十．一活動，唔知係咪忙中有錯抑或有心玩嘢，遼寧省政府最近喺網上搞咗個專版介紹建政60年來的歷史（ http://www.ln.gov.cn/qmzx/60ngq/awzg/hg/200909/t20090909_419814.html），其中介紹「紅色的歌」部份，提到侯德健嘅《龍的傳人》，呢首歌創作於78年中美建交之時，歷史意義極大。
但離奇嘅係，內文同時講到，侯德健喺學潮中改寫過呢首歌嘅歌詞，仲曾經喺《民主歌聲獻中華》中演唱（圖）。
唔少網民對官網提及《民主歌聲獻中華》深表詫異，因為內地一向視六四為禁地，又點會喺建政60年嘅「大喜日子」提六四？
網民QuncyLau話，可能《民主歌聲獻中華》個名改得好，唔覺意俾內地官員攝到位；Gavin就認為同一個「懶」字有關，因為維基百科都係咁介紹首歌，班官貼文前完全冇查究。點都好，Jani話必須向遼寧省政府致敬。