特區高官呢排忙於出席大大小小嘅中共建政60周年活動，唔少人更要一日走幾場，作為特區之首嘅煲呔更練就分身之術，噚晚飛北京面聖前，仲可以出席連場活動，秘訣係─快閃。
逗留唔夠半粒鐘
煲呔伉儷噚日朝8點抵達維園，出席中華總商會嘅國慶60周年千萬行大騷。煲呔作為起步禮主禮嘉賓，獲大會分發一支區旗，到剪綵時，人哋個個嘉賓都係一手揮旗一手剪綵，但煲呔竟然將支區旗順手插入個褲袋，呢吓嘢都幾突兀。
當隊伍啟步，煲呔兩夫婦未行出維園，就登上一早候駕嘅七人車，快閃鬆人，前後逗留咗唔夠半粒鐘。
唔少嘉賓見煲呔咁做，咪有樣學樣做快閃黨，好似民政事務總署署長陳甘美華咁吖，原來佢部車已經一早喺維園入面。其他嘉賓亦唔執輸，一出維園就掉頭走，剩番啲市民繼續撐埋場大騷。