都怪敏妮衰多口！上個禮拜五，敏妮寫咗篇題為《抽「中」就「揩」嘢》嘅文章，結果俾Mr.B話敏妮喺其他散戶傷口灑鹽，但敏妮都算有「報應」，事關抽新股咁多年，都未試過抽唔到新股，收唔到退票。結果抽3隻新股，敏妮只收到兩張退票。
國藥（1099）、中冶（1618）、利郎（1234）3隻新股，敏妮都有抽，3隻都唔中，其中單係中冶上市都未見過招股價，咁蹺3隻新股中，敏妮連利郎嘅退票都入埋銀行，仲未收到中冶退票，唔知係咪寄失咗，但要星期一先可以向有關方面查詢。雖然敏妮只係抽一手，涉及金額有限，但錢多留一日喺人哋銀包，感覺都係唔好。
中冶再令人失望
好彩周末晚上，喺屋企信箱終於見到中冶嘅退票信件，但通常新股掛牌當日，唔係收股票就係收退票，中冶計股價表現外，另一令人失望之處。不過如果有朋友仲未收到退款支票，可以打電話去過戶處問，中冶嘅過戶處係位於合和中心嘅香港中央證券登記有限公司，電話係28628555。如果懷疑支票寄失，過戶處會知會銀行，截咗張票，然後再補發新嘅退票畀你，唔使一個星期就應該搞掂。
當然如果敏妮早就改用eIPO抽股票，就唔會發生呢個問題，因為如果抽唔中，退款會直接過番落敏妮個戶口。不過敏妮用慣黃表抽新股，貪經紀H服務好，好似會提醒敏妮過數、交表，又可以一早交定張form同張支票畀佢，到時佢先同敏妮填銀碼、股數，甚至中途見唔對路，幫敏妮抽飛。有時呢啲咁貼身嘅服務，唔係冷冰冰嘅網上系統幫到你。
溫敏妮