衞生防護中心嘅曾浩輝忙於應付豬流感，但佢話無論點忙，都會抽時間做運動，又唔會食到過飽，以身作則鼓勵大家要活得健康。
曾浩輝噚日出席世界心臟日嘉年華，佢舊年鼓勵市民行多啲樓梯，今年就建議大家跳吓繩。不過佢近來咁忙，唔得閒打網球、羽毛球，重咗兩、三磅，惟有留喺屋企做健身器械，「搞豬流感冇乜時間，不過每日點都會抽三個字至半個鐘做運動，食飯都係食到七分飽。」
立法會議員梁家騮仲堅，出席嘉年華之前同兩個醫生去行麥理浩徑第六及七段，成16公里，一般要行六個鐘。梁醫生為免遲到，於是開足turbo，三個鐘就行完，仲可以冲個凉食個飯先嚟做嘉賓。