貌似影星祖昆馮力士（JoaquinPhoenix）嘅阿仙奴門將文路尼，喺前日對富咸場波正式上位，完場前左撲右撲，保守估計救出4至5球波，令兵工廠險保1:0勝果。難怪向來嚴格、專向小「兵」潑冷水（費事佢哋自大）嘅領隊雲格，賽後都忍唔住畀10分滿分呢個21歲意大利門將。繼馬捷達後，英超再掀意大利「o靚」潮。
左撲右救頂住富咸
平心而論，前日阿仙奴喺場倫敦打吡發揮麻麻，由尹佩斯易邊後初段入波領先後，無以為繼，多得文路尼頂得住，單係睇丹普西射波省中沙格拿改變方向，個意大利仔仍不慌不忙，已經令人擊節讚賞。細心嘅畢傑仲提我，文路尼仲接埋敵方一球勁道十足嘅快開罰球，講到威水，直迫上季尾接連為曼聯建功嘅馬捷達。阿仙奴繼續鬧門將荒，禮拜三歐聯鬥奧林比亞高斯，隨時又係佢嘅表演時間。
我求大俠即時去起佢底，原來佢係嚟自阿特蘭大青訓系統，到05年俾獨具慧眼嘅雲格睇中。阿特蘭大近代戰績麻麻但出唔少猛人，前日一腳射破國際米蘭金身嘅森多利亞前鋒柏仙尼，就係其中例子，兩個嚟自阿特蘭大嘅球員同日發威，話當日不單只係強隊大凶日，仲係「阿特蘭大日」都唔誇張。
阿特蘭大青訓佳品
阿特蘭大出品，多屬佳品，但好似比列斯素利、摩菲奧、迪拉保拿，甚至當年喺祖雲達斯威過嘅泰基拿迪都有啲虎頭蛇尾feel。講時講，我話文路尼似嘅祖昆馮力士，自從憑電影《帝國驕雄》、《弦途有你》提名奧斯卡後，近年傻傻哋，舊年忽然宣佈息影、自我頹廢。文路尼同佢樣似啫，希望際遇唔似。
