最後一場「林海峰是但噏我願意」前晚在紅館舉行，身為Talk騷被玩對象的楊千嬅和藍奕邦均有捧場。林海峰（Jan）提到近日終於有時間與家人一起吃早餐及帶兩個女兒返學時，感觸得有點眼濕，不過搞笑的他居然取笑太太彭羚似死屍。
一連七場「林海峰是但噏我願意」前晚圓滿結束，前晚到紅館捧場的嘉賓有彭羚、林曉峰一家、楊千嬅與母親、農夫、容祖兒、藍奕邦及張繼聰等。身為「被講」對象的千嬅，聽到阿Jan提及她與丁子高的婚事時哈哈大笑，阿Jan說：「我聽朋友講千嬅其實係瞓厲頸，丁子高第一晚有嚟睇，點解你兩個結婚之後都要前後腳？」
阿Jan又問千嬅有否聽丁子高提過talk騷內容，台下的千嬅大叫：「有呀。」阿Jan笑答：「真係一個好男人，去過邊睇過啲乜都講番畀你聽。」之後阿Jan又模仿藍奕邦在《超級巨聲》中大講金句，阿邦即時拍手大叫。
擔心阿葛病發
節目中途負責主持神級婚禮的葛民輝，突然跑上觀眾席訪問一對新人的父母，去年阿葛曾因心臟不適入院，令阿Jan十分擔心其身體狀況，並說：「阿葛，醫療隊喺後台，我孭唔起你頭家。」其後阿葛於表演中扮喝醉時則說：「唔好飲咁多呀，一陣又拎路牌又撩陰腿。」將日前曹格與側田當街打架一事擺上枱。
「以為去咗殮房」
最後阿Jan向家人致謝時說：「呢一個月我好開心，好耐冇同過屋企人一齊食早餐，又有時間湊細蚊仔返學，見到個女嘅背影，有一種解釋唔到嘅開心。」說到此處他有點激動，一時語塞，之後才接着說：「湊小朋友同安排屋企事好艱難，呢幾晚我太太嚟睇我，之後我返到睡房，以為自己去咗殮房，佢用啲被圍住自己個頭，我好想埋去幫佢把脈。」事後阿Jan死撐自己不是激動，只是太攰。
採訪：李珮洳
攝影：黃文成