太陽之下無新事，今時今日乜都可以上市。即將招股的神冠控股（829），賣點又係玩中國之最，「最」在製造食用膠原蛋白腸衣。
中國大市場效應，令腸衣有價，神冠去年股東應佔溢利超過1.7億元（人民幣．下同），升43%；上市前的半年開Turbo「谷得好行」，盈利升66%至1.29億元。睇數字，做腸衣原來好好搵，公司過去3年毛利率介乎52至57%已經夠誇，今年上半年更無端端急升至62%水平。不過睇番佢中式腸衣過去3年銷售額，只維持平穩喺五、六千萬元；近期主力搞西式腸衣出口，係咪單靠「走出去」令毛利急升仲有待觀察。
過去3年公司派息佔股東應佔溢利95%、98%及108%，即係話舊年派嘅比賺嘅仲多。無他，因為公司過去一直受政府補貼，單係上半年已有930萬元袋袋平安，難怪派息絕不手軟。
神冠及澳優逐樣秤
類似原股東骨水疑雲中冶（1618）亦有，一度以為係原有股東分到太多貨，未等到上市就想在場外沽售，結果發現未必係咁，因為最大的原股東社保基金只揸唔夠2%股權。神冠往績疑點重重，加上行業冷門，人抽你又抽，小心反過來被抽水。
講到食品新股，都要留意下澳優乳業（1717），因為三聚氰胺事件，標榜進口奶源嘅澳優大受歡迎，市佔率達2.25%，喺中國嬰兒奶粉生產商中排名第13，預料今年全年的盈利增長1.6倍之多，因為目前只覆蓋20個省，前景秀麗。不過，去年公司生產的奶粉被檢出阪崎腸桿菌，主要係因為進口奶粉需要長時間的海上運輸，易受天氣、風向等多個因素影響造成污染。
投資者要找新的蒙牛（2319），其實剛在美國上市的飛鶴乳業可能更勝一籌。話說飛鶴要把握毒奶事件中的清白之軀做大做強，向紅杉籌旗6300萬美元，協議公司未來3年須實現每股收益近3倍增長，記得蒙牛上市時同樣與投行做過同類對賭業績協議，結果牛根生勝一仗，經過一輪行業危機洗牌效應後仲咁冒險進取，看來中國乳業市場的龍爭虎鬥才剛開始。
胡孟青