做人唔使憂柴憂米，有得揀梗係最好，賭波最大樂趣都係選擇多、時間自由，派彩相若，自己有心得，冇話一定要賭4大聯賽；今晚嗰場英超冇乜心水，小弟見到日乙大魚腩櫪木SC出場，跟開本欄都知，梗係捧升班在望嘅1哥大阪櫻花，主場大炒對手。
足球員生涯短暫，良禽擇木而棲，絕對可以理解，冇乜幾隊好似櫪木咁，以大學生為主力，十戰九輸，但踢快樂足球無所謂。有些人天生要做勝利者，事事以自己為先，注定要行一條孤獨路。蘇甘保可以講係英國足球壇一個沉默但出色嘅領袖，踢中堅十幾年卻強壯如牛，絕少缺勤；當年為追求更好發展，反骨轉投阿仙奴，受盡熱刺躉侮辱，但不哼一句，結果冇揀錯，贏過兩屆超聯錦標；已經35歲，踢過一場英乙終棄戰可以諒解，50萬港元一個禮拜都肯放棄，有得揀，你話人可以幾有骨氣。
贏埋應穩佔前3
大阪櫻花喺日乙度過第3個球季，佢哋當然唔想永遠屈居同市飛腳之下，今季仲有10場，贏埋櫪木同下仗另一弱旅嘅黃蜂，穩佔前3一席回升應無問題；班波入得多失得多，今場見到嚿大魚腩，已入24球嘅國腳香川真司無理由唔幫班波盡數，想成世屈喺日乙咩？對手踢開快樂足球唔會死守，波友博大炒仲有大把時間度過愉快嘅周日！（下次見報日：周二）
文：Leung
簡介：不理盤路，不信陰謀論，最重勤力睇波，跟足軍情，吼準一擊。
今日精選
星期日3大阪櫻花勝[-1](1.85）
星期日3大阪櫻花勝4:1(14),5:1(29)x星期日4札幌岡薩多勝3:2(26),和3:3(60)2x3
簡評：反正主流聯賽平淡，何妨中午飲茶先下一注