香港幾乎全城禁煙，搞到煙民同控煙辦大玩貓捉老鼠遊戲。有內部人士向八方報料，指前特首董建華家族旗下東方海外物流位於太古坊和域大廈辦事處，有多名「煙鏟」高層經常在後樓梯及男廁煲煙，雖然控煙辦曾突擊巡查，發現梯間有好多煙蒂，但因為冇人當場斷正，所以唔能夠檢控。
據東方海外物流內部消息，最少有四、五個煙鏟高層經常違例煲煙，雖然「煙格」位於後樓梯或男廁，但都影響到其他唔吸煙同事。消息指有人曾向上司投訴，但冇下文，質疑有人包庇煙鏟，佢惟有向控煙辦舉報。
控煙辦透露本月初曾上門突擊巡查，不過冇發現。報料者認為呢種「捉姦在床」政策有問題，會再投訴。東方海外國際發言人表示，不能接受員工在辦公室吸煙，會向相關附屬公司解釋禁煙政策。