中國地產（1838）現價係NAV兩折水位，睇長線少少，爆炸力可以好驚人。中國地產最新NAV約莫11蚊，現價2.39元折讓78%，只係NAV兩折水位。又中國地產股東權益195億銀，唔係嘢少。同集團股東權益近磅嘅內房股有北京北辰（588，股東權益125億銀），NAV折讓得番20%。至於碧桂園（2007，160億銀）及富力（2777，232億銀），PB同樣係兩倍樓上，中國地產折讓大得離晒譜。
再講，中國地產主打上海房產業務，集團兼喺南京路擁有優質靚地，而上海市又係阿爺屬意打造嘅金融中心，中國地產中線升值潛力，可以好爆炸。計計數，中國地產現價係咁意翻一番到4.78元，PB都係講緊得0.43倍，未有耐追到近磅股水位。
泛海折讓大得離譜
泛海集團（129）經合股、另齋計酒店資產實際價值浮水後嘅NAV5蚊，現價0.96元嘅折讓，高達81%。股價連NAV兩折都唔夠，又係大到離晒譜。而呢個月頭，阿媽滙漢控股（214）行使認股權，增持泛海3.7%或9800萬股，每股認購價講緊0.85元，都係同泛海現價差無幾。同上邊中國地產一樣，泛海現價就算翻一番到1.92元，NAV折讓仍然高達62%，未有耐升過龍。
錢雋