民建聯噚晚喺文化中心外舉行《紅色搖滾音樂會》，最矚目係請到老牌Band友夏韶聲演出，因為佢有首新歌《大國崛起》，宣揚新中國成就，愛國人士十分啱聽。
高叫「平反六四」
夏韶聲出場時全場都好high，當佢唱到第三首歌《力量》時，忽然有班人衝上台搶咪，觀眾初時以為係特別環節，唔知發生乜事，現場消息話，有人搶咪後大嗌「平反六四，結束一黨專政」、「搖滾不容殺人政權」等口號，同時快速展示寫上「結束一黨專政」橫額。
呢個時候，民建聯先驚覺出事，副主席張國鈞同幾個保安一擁而上，將班踩場人士拉走，場面十分混亂，後來有警員到場。踩場人士事後喺附近燃點白蠟燭，象徵悼念六四英靈，又繼續高喊「搖滾不容殺人政權」口號。