如果編輯可以畀我遲啲交稿嘅話，我會同佢講多謝佢；如果係都要喺deadline加上一個期限，我希望係一萬年。講番正題，本報娛樂版嚴選40句港產經典對白，李小龍在《精武門》為全中國人爭氣的一句「中國人唔係病夫」，字字鏗鏘，振奮人心，至今無人不曉，大熱登上經典對白No.1。對於這金句傳誦至今，倪匡昨日只對記者說：「寫嗰陣冇諗過會有乜影響，亦都冇刻意去度，只係隨住故事需要諗到就寫。我寫過幾百個劇本，邊記得咁多？」 撰文：蘇芬妮
1
中國人唔係病夫！（陳真）
陳真帶着東亞病夫匾額，單挑虹口道場，打到班嘍囉一仆一碌。東亞病夫？同我吞咗呢幾粒字佢！
—《精武門》（1972）
2
「曾經有一份至真嘅愛情擺喺我面前，但我冇去珍惜，到冇咗嘅時候先至後悔莫及，塵世間最痛苦莫過於此。如果個天可以畀個機會我返轉頭嘅話，我會同個女仔講我愛佢；如果係都要喺呢份愛加上一個期限，我希望係一萬年。」（至尊寶）
至尊寶戴上金剛圈，前塵世事化為一縷青煙。
—《西遊記大結局之仙履奇緣》（1995）
3
「我不嬲講嘢都咁大聲，我大聲講嘢唔代表我冇禮貌！」（鍾天正）
監犯也是人，也有人權，周潤發為他們出了一口氣。
—《監獄風雲》（1987）
4
「你話三年。三年之後又三年，三年之後又三年！十年都嚟緊頭啦老細！」（陳永仁）
陳永仁被黃Sir推入無間地獄梗係火。柴九話人生有幾多個十年，但又有幾多個三年可以蹉跎？
—《無間道》（2002）
5
「食碗面，反碗底！」（朱為仁）
雖然後世將碗面碗底重組，變成更多騎呢版本，但依然是吳楚帆這金句最為經典。
—《香港屋簷下》（1964）
6
「你快點回火星吧！地球是很危險的。」（五師弟）
趙薇剃光頭請纓代少林足球隊上陣，星爺笑她似火星人都算厚道。
—《少林足球》（2001）
7
「1960年4月16號下晝3點之前嘅一分鐘，你同我喺埋一齊。因為你，我會記得嗰一分鐘。由家開始，我哋就係一分鐘嘅朋友。呢個係事實嚟，你追唔番，因為已經過去咗。」（旭仔）
張國榮教曉大家最直接的媾女秘技，相信條橋喺地球毀滅之前仍然work。
—《阿飛正傳》（1990）
8
「唉，女人真係茶煲。麻煩呀，trouble！」（船頭尺）
導演用「茶煲」來帶出船頭尺的草根味是神來之筆，茶煲更成為了當代潮語。
—《秋天的童話》（1987）
9
「萬佛朝宗～～～」（龍劍飛）
曹達華意外悟出如來神掌第九式，拿拿聲使出對付三絕掌。
—《如來神掌》（1964）
10
「我衰咗三年，我等緊個機會，爭番口氣。唔係要證明話畀人聽我威，只係想話畀人聽，我唔見咗嘅嘢我想自己攞番！」（Mark哥）
吳宇森愛說教，黑幫電影都唔例外，這句經典成為無數港人的座右銘。
—《英雄本色》（1987）
以下金句，排名不分先後
「魚蛋亦都冇魚味，但係你為咗掩飾，專登加啲咖喱汁將佢做成咖喱魚蛋，但係咁做太天真，因為你煮嘅時間唔夠，咖喱味根本只係喺表面，而冇入到裏面，掂到湯之後仲要冲走埋。好好哋一粒咖喱魚蛋，俾你整到冇魚味亦都冇咖喱味，失敗！」（食神）
食神對着雞姐碗嗱喳麪一輪嘴狂噴，邊個話雞一定有雞味先？
—《食神》（1996）
「闔家鏟泥齊種樹，汝家池塘多鮫魚，魚肥果熟嫲撚飯，你老母兮親下廚！」（唐伯虎、對穿祥）
唐伯虎一句語帶雙關的貴親下廚，對穿祥應聲倒地。
—《唐伯虎點秋香》（1993）
「你睇我唔到！你睇我唔到！」（賭聖）
賭聖用特異功能隱身避過賭俠視線，三叔想有樣學樣？梗係冇運行啦。
—《賭俠》（1990）
「錯，呢支唔係普通嘅電筒，呢支係唔使電芯嘅太陽能電筒。喺有光源嘅時候佢會着。（咁如果冇光？）係絕對唔會着。只要攞另一支電筒出嚟照住佢，佢就會着嘞。」（聞西）
除太陽能電筒，聞西還發明「攞你命三千」。
—《國產凌凌漆》（1994）
「就算係一張廁紙、一條底褲都有佢本身嘅用處o架嘛。」（司令）
淪為豬肉佬的凌凌漆受國家委託，換來竟是司令的冷諷。
—《國產凌凌漆》（1994）
「阿Sir，我冇做大佬好耐啦！」（豪哥）
豪哥從良但不獲細佬杰仔原諒，一句語帶雙關的對白，大佬真係唔易做。
—《英雄本色》（1987）
「唔好搵支槍指住我個頭呀！」（Mark哥）
Mark哥寧願死都唔會俾人用支槍指住個頭，有guts。
—《英雄本色》（1987）
「我係差人。」（陳永仁）
「邊個知呀？」（劉健明）
卧底陳永仁要攞番差人身份，犯險約劉健明到天台講數。
—《無間道》（2002）
「我要打10個！」（葉問）
葉問怒打東洋鬼子，唔使隻揪，一齊上啦，出自全宇宙最好打的甄子丹口中更有說服力。
—《葉問》（2008）
「麥當娜約咗麥當雄去麥當奴道嗰間麥當勞食麥皮撈當歸。」（阿Wing）
靚靚教哥哥念急口令定驚，肯定可以分散注意力。
—《金枝玉葉》（1994）
「我少讀書，你唔好呃我！」（陳真）
陳真讀得書少，但深明大義，不似有人以讀得書少為藉口，做事不負責任。
—《精武門》（1972）
「冇信心就一定會輸！」（李建華）
華仔名言，之後人人跟住講，不過有信心還有信心，冇實力咪又係輸。
—《傲氣雄鷹》（1989）
「我烏蠅寧願做一日英雄，都唔想做一世烏蠅呀！」（烏蠅）
烏蠅唔想一世俾人睇唔起，堅持做單大嘢，華仔勸極唔聽。
—《旺角卡門》（1988）
「放下屠刀，立地信耶穌！」（牧師）
阿叔向山雞傳道，稱耶穌不會出賣你，死了三日又會復活，跟得過。
—《古惑仔之人在江湖》（1996）
「有水有水，冇水冇水；有水過水，冇水散水！」（消防員）
當年消防員冇水真係唔會救火。
—《七十二家房客》（1973）
「8點……有骨氣。」（Long根）
垂死的Long根緩緩吐出大D集會的地點。杜琪峯向同行示範了高手賣廣告的伎倆。
—《黑社會》（2005）
「愛兄弟定愛黃金？」（入會儀式主持）
撈偏行邪，入門儀式尚講求忠義兩字，無奈世上太多人見利忘義，連蠱惑仔都不如。
—《黑社會》（2005）
「我最多怨自己運氣唔好，從來冇懷疑過自己嘅才華。」（戲班樂師）
秦沛一句話燃起劉青雲的鬥志，也令懷才不遇的人重拾自信。
—《新不了情》（1993）
「學名係無定向喪心病狂間歇性全身機能失調症。」（醫生）
星爺患上該病，隨即演繹各種失常病徵，喜劇之王的solo戲。
—《家有囍事》（1992）
「在1994年的5月1號，有一個女人跟我講一聲生日快樂，因為這句話，我會一直記住這個女人。如果記憶也是一個罐頭的話，我希望這個罐頭不會過期，如果一定要加一個日子的話，我希望它是一萬年。」（何志武）
金城武的罐頭宣言，間接啟發星爺創作他的愛你一萬年金句。
—《重慶森林》（1994）
「牌品唔好，即係人品唔好。」（德華）
打牌揀女婿萬試萬靈，唔怪得楊千嬅父第一次見丁子高，都要跟他切磋切磋。
—《嚦咕嚦咕新年財》（2002）
「大家唔好唞氣！」（九叔）
林正英對付殭屍方法獨特，自此套套殭屍片都玩閉氣橋段，玩極都唔厭。
—《殭屍先生》（1985）
「當你唔可以再擁有嘅時候，你唯一可以做嘅，就係令自己唔好忘記。」（歐陽鋒）
明知不能擁有，但又忘不了，此話出自張國榮，更添動人凄美。
—《東邪西毒》（1994）
「一念天堂，一念地獄。」（大隻佬）
華仔在戲中跟張兆輝談「因果論」，現實中這佛偈永遠能應驗在任何人身上。
—《大隻佬》（2003）
「WhoamI~~~~~」（WhoamI）
成龍失憶，欲尋回身份但處處碰壁，一幕衝上樓頂振臂高呼我是誰，觀眾笑他多過同情他。
—《我是誰》（1998）
「有殺冇賠！」（阿全）
秦沛扮演精神病患者，手執兩柄老牛闖入幼稚園喊叫有殺冇賠，為他贏得金像獎最佳男配角。
—《癲佬正傳》（1986）
「你哋呢班馬騮，師傅平時係點樣教你哋？」（黃飛鴻）
《黃飛鴻》電影拍了一大堆，梁寬、阿蘇係都要生事，唔激死關德興就怪了。
—《黃飛鴻》系列
「唔賭唔知時運到，唔滾唔知身體好。」（郭天佑）
曾志偉戲中率領小春等人背妻召妓。從此，去滾都有個藉口。
—《大丈夫》（2003）
「不如我哋由頭再嚟過。」（何寶榮）
張國榮向梁朝偉哀求重新開始，也成為男女面臨分手的終極台詞。
—《春光乍洩》（1997）
「導演呀，陣間我除咗熱之外，可唔可以表現多一種孤獨嘅冷呀？」（尹天仇）
周星馳運用史坦尼夫斯基的方法演技去做娟姐替身。
—《喜劇之王》（1999）
