香港果然係反共基地，一班「反中亂港」分子，噚日聚埋一齊，可惜八方嚟唔切通風報信，否則應記一功。十．一前中共傾舉國之力維穩，偏偏睇漏咗白鴿黨噚日喺大埔教育學院舉行個甚麼「中國是否和平崛起的大國」研討會，山長水遠開大會，冇景轟就奇！
曾做人大代表嘅李鵬飛噚日在會上直指香港頭一、二號反中亂港人物俱在，天字第一號係華叔，之後就係馬丁，加埋鬧中共唔收口嘅毓民都有與會，今次真係作反嘞。
華叔真正係老愛國
華叔就話，反中亂港呢頂帽子絕不敢戴，強調自己係老愛國，反窒飛哥，「我做過《基本法》草委，你後期先做人大，你老得過我？」
華叔嚴正聲明，自己既不反中國，也不反中共，何來反中？所以咪亂扣帽子。佢話幾十年嚟，香港只發生過一件反中亂港嘅事，就係六七暴動！全場報以掌聲。被人鬧係漢奸嘅馬丁，對於反中亂港之名一笑置之，「如果有人話我反中，我話佢亂講。」
港人治港已成笑話，大家惟有亂講。在場人士聽到華叔、馬丁一唱一和，無不笑到氣咳，馬丁更即場示範反竊聽技術，就係單手將手機電池除下，因為只要手機有電，都可以成為竊聽工具，所以傾密偈時佢習慣拆電。馬丁不經意露一手，與會嘅疑似反中亂港分子又學到嘢。
馬丁反竊聽太天真
嘿！八方一直都認為所謂反中亂港分子太儍太天真，以為咁就可以反竊聽？你們不知道強國科技有多厲害嗎？至於當年被迫封咪，一度避走美國嘅毓民，喺一、二號反中亂港分子面前，有冇資格反中亂港，八方都十分懷疑。佢噚日自爆，早前去美加表演棟篤笑，有移居當地親共人士恥笑佢走投無路，香港無立錐之地，先至要去美加開騷，點知俾佢寸返轉頭，「你咪仲走得快過我！」對方當堂啞咗。
華叔指六七暴動係反中亂港大禍，毓民話百分之一千認同，「我掟蕉，曾蔭權最多O嘴；掟菠蘿，死人喎。」佢又話只要馬丁、華叔支持總辭，佢自認契弟都冇所謂。
mailto:[email protected]