今年國慶黃金周假期可謂史上最長，旅遊業熱爆。去旅行，必須下榻酒店，可惜股友若想揀酒店股炒，就會發覺選擇有限，目前市場上可供炒作的純內地酒店股其實不算多，最為人熟悉的只有錦江酒店（2006）。
論名氣，錦江酒店在大陸可謂無人不識，星俠幾年來不時北上「巡廠」，算係親身體驗唔少內地民情，不過講真，咁耐以來我都從未入住過該集團旗下任何一間酒店。家陣國內一二線城市，已有不少外國名牌五六星級酒店進駐，幾乎次次都入住此等級數酒店，所以錦江至今尚未賺到我錢。
錦江09年上半年純利僅1.08億元人民幣，下跌39%，表現無乜搶眼之處，情況同一般酒店股分別不大，經濟一差或流行病肆虐，生意就打折扣。
唯一可令錦江加分的是明年上海世博概念，甚至係再遠些少的迪士尼效應，亦因為咁，有關憧憬令錦江今年表現算有交代，由年初唔夠1元，炒過一輪最高上到2.66元，之後由8月中調整至今，現價2.20元。
錦江現價吸引力一般，如想博稍後炒世博慨念，建議待股價回調較深，約在1.65元至1.85元之間才考慮，目標2.60元。
方星俠