要喺英超名利場上位一啲都唔易，尤其遇到一啲保守嘅領隊好似維拉奧尼爾，後生仔要出頭真係要好出位先得；所以今日英超精選，取部份主力難得唞夠嘅維拉，作客布力般開上盤，分頭十足。
講到上位要有耐性，球場上絕對最考龍門心理；遇着正印長期健康少犯錯，後備嗰個可能雪到硬，維拉2號門神巴特古辛要等同胞費度退下來仲要一段日子，之後嗰啲3、4號門將更加唔使諗。但好似踢阿仙奴，19歲嘅阿仙奴4號門將施捷斯尼就好似發緊夢。呢位波蘭仔係將門之後，上季喺預備組練習整斷雙手，唞咗半年；季前雲格畀咗件53號球衣佢加入1隊，估唔到球隊頭2號門將齊傷，有機會剛喺聯賽盃擔正，表現仲好醒，今晚仲會喺英超做後備，你話係咪發夢一樣。
作客特勁盤路醒神
不過機會有時轉瞬即逝，後生仔真係要好好把握，循規蹈矩；曼聯嘅馬捷達就入番雪房，香港嗰位樂壇新人，出一隻碟就喺紅館開個唱也文也武，近年是非不絕，唔知自愛，好快玩完。講番精選，維拉踢法機動，擅打反擊，所以近兩季作客特勁，上季頭10場「讓球」盤贏8成，近態回起已錄得6連勝，又唔使踢周中歐洲賽；今次作客對冇乜入球能力嘅布力般，賠率實在超筍，咪以為作客讓平/半高水一定係鬼盤喎！
（下次見報日：周日）
Leung
簡介：不理盤路，不信陰謀論，最重勤力睇波，跟足軍情，吼準一擊。
今日精選
星期六25阿士東維拉（上）（2.03）
星期六25阿士東維拉勝2:0（9.5）、2:1（8.5）x
星期六29車路士勝2:0（5.5）、3:1（11）2x3
簡評：維拉作客遠勝主場，再博一條正路2串3波膽。