最有效嘅纖體中心，原來係懲教署。成日扮鬼扮馬，曾經着上蜘蛛俠緊身衣示威，被稱為「鬼佬長毛」嘅MattPearce，去年8月攀上青馬大橋抗議中國冇人權，今年3月被裁定公眾地方妨擾罪成入獄半年。由於佢獄中表現良好，坐監四個月就重獲自由，好友接佢出冊時差啲唔認得佢，因為佢激減逾40磅，由肥佬變型男。
據阿Matt講，獄中生活不太刻苦，最唔慣係要朝早6點起身，之後要去監獄醫院洗地，下午有一個鐘頭「放風」係最開心時間，因為可以喺籃球場跑步做運動，可能日子有功，結果大幅瘦身，輕盈出獄。
獄中猛刨書
自言係政治犯嘅阿Matt話牢獄生涯另一得着係有時間睇好多書，刨晒甘地、馬丁路德金、曼德拉等偉人傳記，可惜冇乜志同道合中人，識唔到戰友。身為社民連黨員，Matt日後會繼續搞社運，又會做青年黨員「導師」，佢話公民抗命最緊要係知道後果，爬上青馬橋前其實睇過同類型案例，估計最多坐監半年，自己受得起先去馬。