左丁山經常收到老讀者來信或電郵，老讀者也者，長期讀者，老資格讀者便是。呢日《蘋果》〈名采〉編輯轉來一封信，來自一位老讀者，真係老人家噃。署名「王翁」嘅讀者講及自己行年九十，自六十歲退休，至今三十年，日常生活就係玩吓股票、買賣外匯，故此每日都睇財經新聞，經常睇住有線電視財經資訊台。王翁話以前有線主播講股票升跌之時，會講某某股上升或下跌「百分之幾」，再講埋「升五毫或跌五毫」，現價「五個五毫半」之類，但現時有位廖淑明小姐只報道股市上落「百分之幾」，其他資料就省卻不提。王翁話好唔慣，聽起嚟唔舒服喎，希望阿應春哥哥注意吓。
六十歲退休，炒股炒匯炒到九十歲，樂此不疲，冇穿冇爛，左丁山都想過呢啲生活；想來王翁退休前可能係金融界高人，否則點會有此高超炒技，玩足三十年仲有錢玩落去呀？有一技傍身，的確可以快快樂樂過生活，起碼冇人敢烚你年紀老邁先。但如此股匯齊玩，有冇精神緊張，思覺失調嘅老人病呀？王翁自言：「運動一定要做，我退休後三十年來，每日一小時運動，食嘢唔好食太飽，健康很好，沒有老人病如血壓高、糖尿、風痛、膽固醇高等等，一切都好好，希望你（左丁山）比我更好更長壽！」
多謝晒王翁，可能係你先天命好，後天勤力運動，善於養生之故，故此到咗九十歲，仲可以睇財經台睇到靚女主播有少許疏漏，佩服佩服，左丁山好希望活到九十歲都有你咁好命，到九十歲仲可以炒滙兼寫稿。如此希望，是否可以達到呢？上天有安排還是自己可以爭取？真係唔知。吳敦義帶兒子來港算命問前途，可能係想知道呢一啲生命奧秘啩。
另有一位讀者謝先生自一本辭典影印載有「旮旯」解釋之第八百○八頁寄來，在此多謝。寫到呢度，聽新聞報告，劉吳惠蘭局長宣佈港台新大計，聽落似乎好好，對港台有利，但諗深一層，港台現時高層在六年內全部退休，十年之內，現時嘅第二梯隊亦全部退休，將軍澳廣播大廈落成之日，今日四十零歲嘅港台第三梯隊（要係公務員噃）唔知有幾多位可以接班呢？最頂癮嘅係將來會成立一個顧問委員會，暫未知如何委任，特首會唔會搵曾憲梓做主席，陳永祺做副主席，霍震霆做委員呀？