XBOX嘅無手掣體感ProjectNatal，自E囗後一直係Game界焦點，本來諗住今屆TGS都無機會試玩，點知真身突然抵達會場，而首日更只供歐美傳媒試玩；加諸全程必須喺指定密室內進行，唔可以拍攝及錄影，連場內人士都無得玩。Natal勁成咁，又抵佢咁巴閉嘅！
記者、攝影：陳國輝
《Ricochet》閃身避波 《塊魂》隔空移物
記得6月份，E囗得幾條關於Natal嘅Demo片段，睇落雖然流暢又好過癮，之但係未有機會親身感受，實際效果係點，一直只係估估吓！呢次喺幕張終於見到實機並且有示範，遊戲包括喺E3見過嘅《Ricochet》、一款賽車遊戲，仲有大家勁熟悉嘅《塊魂》㖭！由ProjectNatal嘅創作總監KudoTsunoda首先試玩，《Ricochet》最搞鬼係玩家需要扭動身體及手腳，來避開所有撞埋嚟嘅彩波，可體會到百分百體感嘅樂趣。
而喺《塊魂》玩家會變成真正嘅主角，你需要不斷用雙手向前推，向左右兩邊碌，做出滾動並旋轉方向嘅動作，投入程度跟任記Wii比較，簡直係兩回事。除咗呢幾隻遊戲，XBOX仲宣佈將有大量開發商加入，包括CAPCOM、ElectronicArts、Konami、NamcoBandai、Sega以及SquareEnix，但相信都係意料中事。
《人中之龍4》變AV聚會
ProjectNatal不作公開試玩，但會場最熱鬧之一嘅SEGA，就幾乎逼爆！點解？之咪係AV女優搞聚會囉！查實係廠方宣佈明年初推出最新遊戲《人中之龍4》，今集延續上代勁受歡迎嘅培訓囡囡系統，最爆係7位AV女優竟現身會場，你仲可以走埋去，坐上「皇帝位」同佢近距離影合照，爽死一班宅男！
官網一直無遊戲消息，今次終於爆料，呢集主角除咗桐生一馬，另有3名可供操作嘅角色，即係話多咗故事分支；遊戲地圖亦唔止歌舞伎町，你仲可以走上大廈天台或地下水道；新一集故事發生於幾年後，養女阿遙大個咗，但點解桐生一馬仲係咁後生型仔？
會場必試大作
《MetalGearSolid:PeaceWalker》
最新一集又落番手提機，最正係玩法十足PS3版本，招式變化多端，仲加插Online元素，可以合作出擊，你箍頸，我冧友，一齊完成任務。
平台：PSP
推出日期：2010年
《WinningEleven2010》
最大改動除球員資料更新，亦強化球員嘅操作，傳波嗰陣唔止係得8個方向，玩家仲可以360度控制，真實度大提升；可否擊敗FIFA就要拭目以待。
平台：PS3/XB360
推出日期：11月5日
《鐵拳6》
畫面繼續華麗，而更令人喜出望外係加入全新玩法，即除咗格鬥模式，玩家仲可以兩個人邊行邊對付敵人，變成一隻3D動作遊戲，夠晒新鮮感！
平台：PS3/XB360
推出日期：10月29日
周邊花絮
