三星（SAMSUNG）力谷LED背光燈技術嘅LED高清電視省靚咗招牌，點知未夠一年，國產貨都出咗LEDiDTV，機身比三星仲要薄啲㖭。噚日直銷中心DSC喺上水旗艦店咪展示咗康佳最新型號嘅全高清LEDiDTV「e-LED88」。DSC發言人Ivon話，呢部機嘅其中一個賣點，就係夠薄，機身厚度最薄只有1.99厘米，比三星嘅2.99厘米，薄咗1厘米。
55吋賣$28,800
Ivon又話，e-LED88唔只電視咁簡單，仲設有上網功能，公司同新浪網合作，可以即時上網睇新聞、天氣、股市資訊，又可下載電影、音樂，仲支援家網絡最流行嘅RMVB格式影片。新型號有兩個size，分別係46吋賣24,800蚊，55吋賣28,800蚊。
國產貨玩LED背光燈技術，畫質掂唔掂真係要問吓專家。電腦商會會長Jacky話，內地有足夠嘅技術可以做到LED背光嘅iDTV，畫質未必差過韓國貨，家部機做到機身最薄只有1.99厘米，真係好薄。但講到價位都係貴咗啲，一般46吋LCDiDTV都係賣兩萬蚊樓下，「如果唔係急住換電視，可以等多半年，機價至少跌三成。」