泛民就策劃五區總辭達成三點共識，其實喺噚日飯盒會上，仲得出第四個共識，隨時比其他三個共識更重要。飯盒會後泛民開記者會，乜都未講之前，白鴿黨卿姐先開腔，話民主社會講乜都冇所謂，「不過最緊要唔好講粗口」。
開會爆粗 立即離場
社民連三子舊年引入議會語言新文化，仆街、不該、poorguy在議事堂內不絕於耳。泛民內部會議時炒蝦拆蟹，問候媽媽聲音更加嘹亮，卿姐對此睇唔過眼，終於忍無可忍提出抗議，噚日表明呢個問題要十分嚴肅處理。
卿姐話如果日後開會時有人講粗口，佢會即時離場，不論係鬧佢抑或問候其他議員，總之就零容忍，「如果我起身（離席），大家唔使再問我發生乜嘢事。」佢指以粗口鬧人好離譜，「我哋生出嚟唔係俾人鬧嘅！」
經卿姐嚴詞訓話，平日粗口隨時脫口而出嘅長毛即刻乖乖哋收口，可惜卿姐冇詳細說明邊個助語詞、動詞、形容詞不能說，否則可供立法會主席曾鈺成參考。卿姐發火事出有因，事緣幾個星期前佢應邀到旺角出席街頭論壇，由於好多人不滿白鴿黨對總辭態度扭擰，矛頭直指卿姐，當街爆粗指罵，卿姐不甘受辱，幾度拍枱掟咪，場面十分不愉快。因此之故，卿姐覺得此風不可長，否則次次遭語言暴力好難頂。
鬧完仁哥 長毛道歉
另一個原因，就係長毛在網上電台節目中，以極度純正兼流暢嘅粗口公開怒斥何俊仁幾十分鐘，唔少人聽完都O晒嘴，後來長毛要向仁哥道歉平息風波。八方聽聞卿姐都想幫仁哥討回公道，呢次一箭雙鵰，相信有關人等會暫時收斂吓。
政壇粗口王唔一定係長毛，陳偉業、毓民亦功力深厚，小道消息話白鴿黨開會時，亦偶然出現爆粗場面，但自卿姐入黨後，各人自動收口。仁哥噚日則開腔讚長毛，「佢唔鬧人嘅時候，原來好溫柔。」
mailto:[email protected]