玩股票玩咗幾年,由初初蝕到入肉,到家學精咗扮專家,有時賭波輸咗幾多,都喺股票贏得返嚟。到近月風水輪流轉,以為自己沽咗回落緊嘅中國人壽,贏錢離場好醒;點知特登揀咗隻對我好重要、以周年紀念日子作股票代號嘅股仔,兩日內蝕到我攤攤腰。今次調轉喺賭波獲利救番股票輸嗰啲,好多嘢都係循環咁。
前度戰友賴恩11月就會做老襯,呢位老死認真唔話得,搵我做伴郎幫佢冲喜吓。賴恩離開咗體育版都有一段時間,條友仔呢排好無聊等做老襯,早兩日又問我,有冇興趣做佢未來囝囝囡囡嘅契爺。講真契爺要做嘅工作我真係唔清楚。本欄6連勝,就送愛華頓單W畀未來契仔契女。
畢傑
近5場往績:WWWWW
主客和:愛華頓勝
心得:樸茅仲未得住