公民教育委員會冇乜嘢叻,最巴閉就係每日傍晚時分喺唔同電視頻道,強迫大家聽《義勇軍進行曲》,由04年開始播《心繫家國》開始,唔經唔覺都製作咗五輯短片。下個星期慶祝十.一,公民教育委員會會推出新一輯電視宣傳片《輝煌里程》,內容重點梗係講國家呢60年嚟嘅發展同成就,主旋律係歌功頌德,自不待言。
製作呢六集各長15秒嘅短片,製作費要110萬元,當局成日話短片可以加深港人對國家嘅認識,呢啲短片次次都只係宣揚正面訊息,衰嘢就一句都唔提,報喜不報憂,效果有幾大市民心中有數。其實睇完武警打記者段片,咪仲了解國家成就如何輝煌。