轆Book:SportcityOne 型格女鐵騎

轆Book:
SportcityOne 型格女鐵騎

綿羊仔細細架,自動波,輕鬆操控代步最啱。為咗強攻呢個市場,意大利品牌aprilia深明唔使快至緊要平先係吸引真正用家之道,所以實行反璞歸真,由年初見街嘅300cc大容積之作,縮水回吐反高潮推出125cc容積嘅新作SportcityOne,大轆、小平台特色不變。如果話,300Cube係猛男,咁呢部125,都可算係型格女騎士。

記者:許維雅
攝影:梁細權
Model:Eagle

延續大轆家族味

喺香港揸綿羊仔唔算普及,但若然有個全球最應該揸綿羊仔嘅地方排行榜,香港一定排第一,人口密集程度極高、油價特高都有分加。一架又慳油又穩定嘅綿羊仔點會唔係代步首選。全新aprilia嘅SportcityOne125就有齊呢兩大元素,跟年初推出嘅300Cube相比,汽缸容積大幅降至125cc,耗油量大約只需3至4毫子一公里,慳家程度更高。即使好多大羊都只用12至13吋輪胎,SportcityOne就保留大輪胎特色,選用14吋輪胎,令落斜或者高速行駛時無咁飄,感覺更穩定。就連一向揸開綿羊嘅靚女Eagle都讚佢夠安全感又好玩。「感覺好易揸,即使加速之後都會覺得好穩陣,好好玩。」

■闊大小平台
夠晒實用。

■只有大架沒有側架,係唯一略嫌唔夠方便嘅地方。

歐洲羊罕有超值

除咗有大轆遺傳,SportcityOne嘅外觀都好明顯出自同一家族,充滿動感嘅黃黑色車身,尖頭尖尾、高六角形側鏡嘅設計帶出家族嘅運動氣息。此外,更有黑和銀兩種顏色選擇,不過女生可能會略嫌欠咗一般日本綿羊嘅可愛味。而另一家族特色就係一個小平台,腳踏位置嘅闊大平台方便擺放大袋背包,但又唔會阻住雙腳落地,加埋座位下面足夠放一個頭盔嘅儲物空間,唔使勉強加個尾箱影響外觀。體積方面,SportcityOne亦比起大佬300Cube更細小輕巧,座位高度只有775mm、長度1,950mm,重心低又輕盈,操控容易又舒適,穿梭橫街小路、泊車攝位時更加容易。雖然馬力輸出唔大,但勝在有平穩暢快嘅操控彌補不足,最重要就係歐洲車嘅價錢竟然跟日本綿羊相若,都只係$21,800,優先預訂仲會減$2,000,最平月供都係幾百元。代理方面話,壓到年尾推出,又如此抵買,全係為2010年鋪路,小試市場反應,似乎暗示出年仲有大量小羊新款推出?

■女騎士都唔一定要可愛,運動味道較強嘅綿羊更有型格。

■車尾線條亦見硬朗,絕非可愛小綿羊。

■無刻意修飾嘅死氣喉,黑色圓滑設計略欠一啲特色。

規格

引擎:125cc風冷四衝程單汽缸
馬力:9.52hp/8,000rpm
扭力:1kg-m/7,000rpm
傳動:CVT無段變速,皮帶傳動
售價:$21,800(預訂價$19,800)
查詢:23850181