車廠搞ConceptCar，天馬行空極，始終叫有板有眼似番架車，行外人就唔同，幾騎呢不切實際都無問題，設計上更為大膽兼過癮得多。上次講過SONY設計咗架識發聲嘅概念車pod，有埋實物喺東京車展度Showoff，其實論催谷自家品牌形象，點都唔夠Nike呢部概念車咁頂癮。採用頭二尾一車輪設計，基本上好難將佢定性為成汽車定電單車，成架車流線到好似隻波鞋咁已經夠特別，駕駛者仲要係趴喺度揸，只有車頂而無車門，高速行走時見到個人喺車內Fling吓Fling吓，好鬼危險。今次Nike波鞋戰車連實物都無，只喺賽車遊戲《GT4》度亮相過，速度勁快但唔識轉彎，難怪架車似跑鞋多過似籃球鞋，一啲都唔靈活。