馬會宣佈計劃將部份馬房北移，將廣東從化之亞運馬術場地發展為馬會馬房，將來有近四百匹馬運去從化訓練，出賽時就提早運來香港，車程要四小時。
站在馬主立場，第一個反應就係反對，反對之餘就嘆一句無奈。梗係要反對啦，做馬主又兼係珠三角廠家就話啫，其他馬主要去馬房探訪嘅話，好唔方便，練馬師與騎師分批往從化練馬乎？還是有部份騎師長駐從化？雖然外國賽馬因為地方太大，經常出現如此情況，但不可不知，廣東從無賽馬文化，練馬文化，訓練當地人做馬伕都有排搞，最初兩三年，馬主對「從化」練馬無信心，是所必然。
邊啲練馬師長駐從化？邊啲留在沙田？憑抽籤還是憑挑選？老實講，一個人兩條心未為多，馬主H話如果佢隻馬嘅練馬師調去從化，佢就一定拉馬轉倉，轉往留在沙田嘅馬房，或者冠軍人馬如告東尼、方嘉柏、大摩、蔡約翰四位去咗從化嘅話，佢地仍然可以保持住嘅，其他馬房就難講咯。叫澳紐人士去從化？佢會歡喜先至奇。
賽馬事業一年為特區政府製造超過一百億元稅款，換在任何其他國家地區，當地政府一定愛惜呢樣事業，招待唯恐不周，稅務優惠與撥地建馬房、馬場，樣樣有齊，偏偏呢個特區政府假惺惺，假道學，諸多顧忌班道德塔利班，樣樣窒住馬會，每年收一百億都冇聲多謝，好似同賽馬事業有仇咁款。其實沙田體育學院係馬會捐錢興建嘅，歷史任務已完，應該全部送番俾馬會作擴建馬房之用，將啲馬伕職位留在香港。而啟德機場興建體育城之議，一直得個講字，都唔知政府做乜鬼。在啟德興建大型體育館、運動場、新體育學院，可說一氣呵成，兼且位於市區，交通方便，肯定大受歡迎，可說市民高興，體育界高興，馬會高興，齊齊有贏冇輸。特區政府如果夠厚面皮，最多咪又打馬會心口，叫馬會捐番一啲錢畀啟德體育城！主理體育嘅民政事務局，代表體育界嘅議員霍震霆，不向政府爭取，實在失職，家反而委屈了家嫂，政府死都唔肯撥地，變相逼遷部份馬房，馬圈中人覺得認真冇癮。