Miki唇情

過了秋分，即表示乾爭爭的季節又來臨，第一時間總是想到嘴唇甩皮的痛楚，尤其用了鮮色唇膏後，最怕是那些唇膏「攝」住唇紋和死皮的突兀，認真尷尬。好消息！終於出現救兵。Dior最新推出的SerumdeRouge，既是唇膏又是精華素，潤到令立立，就連櫻唇女楊愛瑾（Miki）都十分鍾情，兼要醒大家幾招護唇心得，以後仲使乜怕龜裂嘴呀？

記者：葉雪芯
攝影：伍慶泉
Hair：VincePang@ILColpo

Miki試用Dior新出滋潤唇膏兼分享個人護唇心得。

潤唇精華多十倍

近幾季都不流行用唇膏，嫌乾巴巴又不夠光澤，個個爭住捧又閃又水潤的唇彩，令一眾日本品牌大放光芒，不過今季開始，情況已漸漸有變，唇膏潮流在外國化妝界開始回歸。講到今季最焦點的，不得不提Dior最新推出的SerumdeRouge，又是唇膏，又是唇部精華。多得早年Dior率先研發了在唇膏內加入修護成份，今季再出加強版，當中護唇精華佔了整支唇膏的20%，即是足足比以往多十倍！除了加入精華素，還有即時豐唇效果的透明質酸，塗抹後馬上焗脹嘴唇，連唇紋都減淡，由於加了精華素成份，光澤和水潤度看上去完全與唇彩有得揮！唇膏顏色選擇出奇的多，一炮過推出六色，主打大熱紅唇色系，要突出唇色，不妨睇睇右列紅唇妝四大重點！

1.粉底不宜太厚，最好用粉底掃上妝，令底妝更貼服，否則底妝太厚再配紅唇，會出現《少林足球》「濃妝阿梅」嚇人情況！

2.要突出紅唇色，眼妝方面，眼線可畫得實色和粗一點，眼影宜選擇淺色系，以免喧賓奪主。

3.睫毛膏可塗厚一點，令眼睛看來更精靈、圓大，有助突出輪廓。

4.上唇膏前，可先用唇線勾畫出唇部線條，令嘴形更完美完整。

羨慕厚唇性感誘人

一向愛用唇彩的Miki，試過這系列唇膏都激讚夠潤：「好似搽咗潤唇膏一樣！」除了最愛其精華素成份之外，亦很欣賞當中含的透明質酸成份：「其實我很羨慕舒淇、樂基兒的豐滿嘴唇，睇落去好Sexy，搽了這款唇膏後感覺嘴唇真的豐盈不少，而且唇紋也少了，不錯！」唇的線條及弧度也自然修飾了。Miki有自己一套秋冬護唇心得：「平日我會特別留意唇部落妝和防曬，因為每日工作都要搽唇膏，所以一定會揀有防曬成份的唇膏，卸妝也會特別留意唇膏要卸得徹底。入秋後我就會多飲蜜糖水或用蜜糖水敷唇，感覺滋潤，萬一甩皮就千萬不要咬唇，我會輕輕用磨砂磨走死皮，再搽潤唇膏護理，否則嘴唇流血，搽乜都好難上色。」難怪Miki唇紅齒白靚過人。