美國聯儲局前晚明言今年都不會退市，但會將購買銀行資產的計劃延長，購買金額則不變，其實應是暗指經濟情況尚可，暫時不用增兵，並以更多時間來觀察，不過市場將之解讀成救市力度減低，道指大跌81點。港股昨日趁美股回軟，期指下跌600點，即市波幅擴大至超過500點，不少投資者頓成驚弓之鳥。大市跌係事實，但筆者主觀認為，昨日可能又造就一次成功率唔高，但值博率高的投機行動。
個股表現相對穩定
早幾日大市在高位徘徊，個股表現其實十分參差，投資者可能會發現指數唔跌，但投資組合卻在縮水。但昨日輪到大市跌，情況卻有所不同，除了一眾大價股跟大市下跌之外，其他個股表現顯然相對穩定，下午開市之後，個股已拒絕回試低位，大市跌近3%，但全部一千三百多隻個股，跌多於3%的只有343隻，即有過千隻個股無跟足大市回調，可見市場並不如表面看來咁恐慌。
筆者亦有另類指標，就係筆者客戶中有不少散戶投資者，昨日大市跌勢甚凶，有好些客戶捱不下來被迫止蝕，如果大戶只係要震倉，相信已達到部份目標。無巧不成話，自從之前大市跌至19296反彈，火箭般升至21964，升幅達2668點，如果以19296作升浪起點，回調上升幅度的黃金比率0.382倍，便是20944水平，昨日低位是20937，筆者唔夠膽估大市已見底，但士佳慣常做法是在關鍵水平前博一博，所以昨日輕量增加了期貨好倉。
當然，以上一半是事實，另一半是推測，昨日外圍無大變動，惟獨港股跌得較多，並不合理，所以大市今日應有反彈。如果今天期指在盤中再下試昨日低位20937，便可能要考慮適量減持，吼低位再買，但這次減持只屬走位，因為早前筆者所講關鍵位19296，就算真係再下試，亦不會跌穿多於一日，如果閣下貨量不多，大可以不理，不過，既然不理，就算跌到幾低位都唔好理啊！
張士佳
華富嘉洛證券投資服務部董事