輕薄版PS3、新手提PSPgo已經曝晒光，今屆TGS2009仲唔輪到《GT5》擔正？無錯！現場的確有試玩，但更壓軸嘅重頭戲，原來係全新體驗嘅PS3立體遊戲！咪聽錯，唔係Wii式體感，而係須要你戴住特製眼鏡，就可以玩到3D激凸遊戲！
記者、攝影：陳國輝
配立體電視戴專用眼鏡
提到3D將殺入屋企，可能有啲驚！好似影碟界早前就出過《血腥情人節》3D版，盒內仲鬼咁好送埋4副立體眼鏡畀你，可惜效果差強人意，仲差啲睇到想暈想嘔。今次PS3推出3DGame，查實與一般3D版影碟好唔同，例如佢唔會用紅藍雙色眼鏡，而改為專用黑超；更爆嘅係，現場上採用咗SONY最近於柏林電子展上公佈嘅立體LCDTV，作為試玩屏幕。
雖然現場得一隻射擊遊戲《WIPEOUT》，但排隊人龍超長，筆者等咗廿分鐘先有試玩。講畫面真係無得頂，無論戰機、敵人，甚至選單都好似浮出畫面咁，立體感勁逼真；再講色彩，佢同一般PS3Game無分別、玩全彩！唔似得3D影碟，唔係偏藍就偏紅咁單調；至於流暢性亦跟平時玩開嘅PS3遊戲無乜分別。
但現場僅設小型試玩區，仲無乜特別宣傳，連暫時有幾多隻3DGames、係咪一定要用立體LCDTV來玩？以及售價及推出日期等，一切資料都未有進一步公佈。
即場實試！
《GT5》試玩新賽道
等到頸都長嘅PS3版《GT5》，大家早預咗現場有實Game試玩！先講畫面，查實同《GT5Prologue》分別不大，今集增加至900款車種以及新賽道，意念上唔算有好大突破。至於現場試玩得一條賽道，發售日及價錢未定。
《FFXIII》首次試玩
另一隻PS3獨佔大作，係今年12月17日推出嘅《FFXIII》！畫面大改進之餘，首度試玩已加入多人戰鬥系統，呢一集將會出現更多召喚獸；至於Online版《FFXIV》則未有同時登場，想玩要再等吓！
試玩區唔算擠迫，早上甚至出現唔使排隊情況。
TGS展會花絮
①今年大概有180幾間參展商，但感覺唔及以前咁逼爆！
②12月會推出一系列PSP電影及漫畫下載，暫只限日本境內。
③呢隻配Keyboard的手掣的確幾型，賣價大約$460。
④會場仲有TGS2009限定版靚T，盛惠二千日圓。（約港幣$170）
⑤帶埋PSP的話，仲可以馬上入PSN單撈五隻遊戲咁多。
⑥家試玩遊戲唔止要求排隊，仲要攞籌㖭！
