下星期二最後一日喺金管局返工嘅任志剛，連日嚟透過唔同場合盡訴心中情。自99年2月起，由佢一手創立嘅每周專欄《觀點》，至今超過10年，累計刊出526期文章，噚日發表題為「再見」嘅呢一篇，係任總「絕唱」之作。
不在其位 不謀其事
天下無不散之筵席，任總喺字裏行間，亦難免有啲愁緒，佢話平日半粒鐘就起貨交稿，但呢次就「不知從何說起」，對住電腦，齋坐半粒鐘都未能成文。無言，乃因想講嘅太多，又唔知應唔應該講，最後佢用中國人嘅格言定調，「不在其位，不謀其事」。
不過華華就認為，中國文化，智慧精妙博大，永遠都有變動空間，好似曾經批評過、又公開讚過任總嘅聯儲局前主席格林斯潘，退休後咪又經常演講，暢論金融時局。任總都話啦，將來若遇上大是大非嘅事，會毫不保留公開自己嘅睇法。國慶後第二日就會走馬上任嘅新總裁陳德霖，唔知仲會唔會一大朝早繼續喺「志剛廣場升旗」（記者謔稱任總返工前，喺金管局樓下向傳媒發表幾句）。《觀點》前途亦要拭目以待。