記得李安納度未執教AC米蘭前，一臉俊朗，神釆飛揚；前晚睇佢，一臉落寞，鬚根都唔少，都咪話唔凄凉。靚佬變臉嘅由來，當然因為隊波不濟，前晚作客以0:1不敵烏甸尼斯。好衰唔衰，同市死敵國際米蘭喺無帥（摩連奴停賽）情況下以3:1擊退拿玻里，今季首度升上榜首。同一個米蘭天空，不一樣景況，呢啲咪叫天堂與地獄囉。
AC輸波獵人黑腳
前晚場波，查實AC米蘭已經排出最強陣，兩個老兵施多夫同埋恩沙基都正選，但當主隊喺20分鐘由大勇嘅迪拿達利入波後，即時打守勢，令本來已經唔多銳嘅AC米蘭老鼠拉龜，下半場換入「獵人」亨特拉爾同朗拿甸奴，大家都想像到唔慌會有起色。
到末段法米尼兩黃變一紅被逐，想扳平就更加唔使諗。李安納度賽後死撐：「我唔可以話隊波唔夠銳，呢場波和波至合理。」佢為AC米蘭賣命多年，靠「老本」暫時應該仲保到個帥位，但隊波5場得7分，長此落去真係捱唔到幾耐。
我求大俠唔係想賴亨特拉爾，但佢都算黑腳，今季踢過4場共170分鐘，其間AC例牌冇波入，點搞？同樣係新兵，國米嘅伊度奧、迪亞高米列圖就生猛到不得了，前晚贏拿玻里場波又各入一球，兩個開季至今加埋就攻入8球。睇「大米」入2:0球波擺明越位，但旁證完全睇唔到，「大米」梗係老實不客氣。未計祖雲達斯作客熱拿亞戰果，國米暫得13分，今季終於首嘗榜首滋味。
摩佬停賽風騷依舊
李安納度樣衰咗，摩連奴就越嚟越神采飛揚，睇直播見到佢坐喺廂座睇波，到走嘅時候心情大好，走去同擔任裁判指導員嘅前光頭球證哥連拿握手，勁風騷。