現年33歲的滕麗名與魏駿傑的9年情玩完後，原本與郭政鴻發展地下情，不過鴻仔被踢爆年幾前暗中翻兜前妻兼誕下女兒，慘受情傷的阿滕仍高調力撐鴻仔。前晚她邊笑邊讚鴻仔是好男人，更強調自己沒有受傷害。
滕麗名和郭政鴻06年尾因合拍劇集《野蠻奶奶大戰戈師奶》而撻着，直至今年7月，阿滕忽然在網誌自爆回復單身，即傳出與鴻仔情變，隨着男方被踢爆與離婚3年的前妻李欣穎翻撻復合，更驚爆兩人育有一名9個月大的女兒後，因而估計鴻仔翻撻前妻近年半，有一腳踏兩船之嫌。
「一定恭喜佢」
雖然阿滕再次慘受情傷，但她前晚到旺角出席髮型活動時仍高調力撐鴻仔，她以艷爆橙紅短髮示人，襯上性感低胸裝，明艷照人。對於鴻仔和前妻復合，阿滕笑說：「呢啲係好事，好朋友一定會恭喜佢，我同朋友講乜亦唔會話畀你知，自己有啲唔開心同不忿，係因為我冇講嗰啲嘢，但周刊就將我講嘅嘢套落去第二啲問題上，咁會傷害別人。」
阿滕強調自己向來都是單身，但不肯透露是否早知鴻仔和前妻復合，她又不肯回答是否認識其前妻，不過當記者取笑她憎恨鴻仔前妻時，她即說：「我冇憎，黐線o架！我同鴻仔有聯絡，大家係好朋友，佢係好好男人，我冇交錯朋友，佢做乜、講乜嘅決定都會支持，總之冇人受傷害。」
對於以後認識異性時會否帶眼識人，阿滕說：「唔想傷害呢個朋友，冇分手冇拍拖，傷害到佢就唔好，大家唔好覺得佢係衰人。」
「我冇受傷害」
提到接二連三在感情路上輸給內地女子，阿滕堅決表示沒有輸給任何人。至於早年曾被拍到與鴻仔親嘴及約會，她說：「知唔知乜嘢叫double位？大街大巷我冇屋企咩？總之好朋友乜都撐，我冇受傷害。近期唔覺有追求者，我心境後生就得。」
採訪、攝影：王崇穎