金融海嘯後，發覺無論經濟周期、股市升跌，甚至新股熱潮都一閃即逝。遠道而來的永利澳門（1128），招股推介大派i-Pod，香車美人雖欠奉，亦有紙醉金迷之感。如斯厚待，當然好過里昂論壇，雖然以6位數字請到前阿拉斯加州長佩琳作閉門演說，但據與會基金經理話，佢唔識經濟，會內有唔少人悶到放蚊。
呢個光怪陸離的年代，講內涵冇市場，多人留意多人講就叫人氣，有人氣就自然吸引到眼球，要靚要即食，宅男選擇睇o靚模；要短線賺大錢，股民唔理價貴借孖展博新股，短線炒味濃，一旦人氣跌，新股亦由萬人迷變地底泥。
國藥（1099）首日高位頭5分鐘見晒，跟住表現疲弱，仲差啲要以全日低位收市。中冶（1618）受原始股傳聞威脅，A股唔單止冇高潮，H股未上市，暗盤已跌穿招股價，最低更見5.88元，連累埋恒盛地產（845）同華潤水泥（1313）慘被抽孖展。
新股由萬人迷變地底泥
新股氣氛180度轉變，除咗定價太進取，亦同場外活動玩大咗有關。中冶吸引過十萬人認購，Ｈ股一手中籤率得8%，未招股就好熱鬧，一時話有中介人有貨，周圍向城中富豪分飛，要求首3日即沽分錢，一時又話反應熱烈，超購逾200倍。
可惜事與願違，隨住A股表現見光死，早前透過中介人接貨及大飛孖展友，未等暗盤已想私底下以折讓沽售，由止賺變止蝕亦係嚟得咁快。
之前同大家分析過，中冶底子唔壞，以近中下限水平6.35元定價，本應留水位推上，點知國藥見光死，睇怕市場會覺得無論幾多倍PE，總之凡係新股都係貴。
理性分析往往敵不過市場恐慌，雖然中冶的大股東，中冶集團同寶鋼早已承諾有分別36及12個月禁售期，而社保基金持股不足2%。會唔會出現金隅（2009）事件，上市一跌跌到尾？論沽壓，社保基金喺金隅由8.22%大減至4.58%，唔俾沽壓砸死都嚇死，相反社保只揸1.83%中冶，低過須披露水平，其實佢減咗都無人知，無謂太擔心，若跌穿4蚊可以買啲放倉底，唔死得嘅。
胡孟青