走音玉女、錯字才女鄧麗欣Stephy早前確診人類豬流感，娛樂圈人人自危，同佢有接觸者都擔心中招，好彩佢唔係「超級毒王」，否則本地娛樂圈就有排煩。Stephy康復後上月底復工，港大感染及傳染病中心總監何栢良透露會搵Stephy幫忙做研究，唔係當佢白老鼠或者放入試管做實驗，係搵佢做代言人，呼籲其他豬流感康復者捐出血漿，製成抗體為病人注射，殺死病毒。
豬流感康復者捐血漿
港大同紅十字會上月起合作研究呢個新療法，目標係收集840個康復者血漿，可惜反應麻麻，至今僅有約100人響應。何教授話如果要趕及明年初第二波豬流感殺到時用抗體醫人，最遲下月底就要集齊800幾人血漿送去美國提煉。佢話紅十字會人員已摩打手打電話畀康復者，平均每日搵成300人，不過成功率僅兩成，好多人都話冇時間或者諸多理由婉拒捐血漿。
由於康復者多數係後生仔女，當局就想到搵明星做宣傳，Stephy係豬流感康復者，又係眾多電車毒男嘅女神，加上佢身為紅會「捐血之星」，搵佢呼籲捐血應該有號召力。Stephy日前都表示唔介意帶頭捐血漿救人，八方聽聞Stephy最快聽日就會同紅十字會開記者會叫康復者幫吓手，有可能即場捐血漿㖭。
粉絲咪亂嚟博打抗體
如果Stephy真係捐出血漿，即係話日後豬流感患者有可能注射到佢嘅抗體，對好多fans而言，有機會同女神啲血溝埋，話唔定覺得感染豬流感都係不幸中之大幸，但八方提醒大家，千祈唔好無知到特登感染豬流感博打針，因為呢個治療方法仍處於研究階段，首批只有幾十人可以嘗試抗體醫豬流感，未必輪到你。
就算提煉抗體成功，亦未必人人願意打針，八方相信傅穎Theresa就唔想嘞，溝咗Stephy啲血，容乜易走音再勁啲兼錯字連篇o架，萬一出現呢啲另類後遺症點算！況且Theresa都可能唔再係金牌大風嘅人，睇怕冇咁易溝埋。18歲以上、體重逾50公斤嘅康復者都可以捐血漿幫人，查詢可致電27101333。
mailto:[email protected]